SERIKALI HAITOI ELIMU BURE BALI INATOA ELIMU BILA ADA

Serikali imesema inatoa elimu bila ada na sio elimu bure na katika Waraka wa Elimu namba 3 wa mwaka 2016 unaainisha kuwa wazazi wana wajibu wa kushiriki kutoa michango kwa ajili ya maendeleo ya kiserikali ikiwemo kujenga miundombinu ya madarasa,vyoo na vinginevyo.

Kauli hiyo imetolewa hii leo Bungeni jijini Dodoma na Naibu Waziri Ofisi ya Rais-TAMISEMI,Davis Silinde wakati akijibu swali la Mbunge wa Nkasi Aida Kenani.

Silnde amesema kuwa uchangiaji wa elimu unaoruhusiwa ni wa hiyari usiohusisha wanafunzi kutohudhuria masomo kwa kushindwa kutoa mchango.

“Majukumu ya jamii na wananchi kuhusu michango yamebainishwa katika waraka wa elimu namba 3 wa mwaka 2016 unaeleza kamati au bodi za shule zitashirikisha jamii katika maamuzi ya masuala mbalimbali yanayohusu maslahi ya maendeleo ya shule hususan uchangiaji wa hiyari na kuwasilisha maamuzi hayo kwa Mkurugenzi wa Halmashauri ili kupata kibali” ameongeza Silinde.

Silinde ameongeza kuwa serikali iliamua kutoa elimu msingi kuanzia elimu ya awali hadi kidato cha nne  bila malipo ili kuwezesha watoto wote wa kitanzania wenye rika la elimu msingi kupata elimu bila kikwazo chochote.

Hilda Ngatunga

See author's posts